بیر سؤز مین آنلام
بیر سؤز مین آنلام
حاضیرلایان: حسین واحدی
واخت کئچدیکجه، اؤلوم ندنی اونودولور. یئرده آنجاق بیر سؤز قالیر: "اؤلدو".
" ژوسئ ساراماقو"
هر اینسانین اؤز آلین‌یازیسی وار. اوندا فالچی یانینا گئتمک نیه گرک‌دیر؟! مگر من آج اولوب-اولمادیغیمی بیلمک اوچون آشپاز یانینا گئدیرم؟
"آرتور قولدئن"
یازماق ایشگنجه‌سی Yazmaq işgəncəsi
یازماق ایشگنجه‌سی
آدلیم یازارلاردان آلینتی‌لار
::: حاضیرلایان: حسین واحدی Hüseyn Vahidi
دئمک اولار، اینسانلار یازیچی‌لیق صنعتی ایله سئودیک‌لری، بونا احتیاج دویدوق‌لاری اوچون مشغول اولورلار، آنجاق بیرپاراسی اوچون یازی گئدیشی‌نین [سوره‌جی‌نین] اؤزو حدسیز درجه‌ده چتین ایشدیر...
کورت ووننئقوت: (KURT VONNEGUT)
“یازاندا اؤزومو اللری، آیاق‌لاری اولمایان، آغزیندا بویا‌لی کارانداش [مداد] توتموش بیری‌سی کیمی دویورام”.
اورتا عصرده آذربایجان تورکجه‌سینین دیلمانج‌لاری
اورتا عصرده آذربایجان تورکجه‌سینین دیلمانج‌لاری
حاضیرلایان: حسین واحدی
بدیعی ادبیاتیمیزین آیریلماز ترکیب حیصه‌سی اولان ترجومه صنعتی‌نین آذربایجان تورکجه سینده قدیم تاریخی و زنگین عنعنه‌لری واردیر.
اورتا عصرلر شرقینده اورتاق ایسلام مدنیتی‌نین فورمالاشماسی نئچه- نئچه یئته‌نکلی آذربایجان تورکجه‌سینین مترجم‌لری‌نین یئتیشمه‌سینه رواج وئردی. بو دیلمانج‌لار آنا دیلیمیزه چئوریلدیگی ترجومه نومونه‌لرینه نظر سالدیقدا اونلارین بو اثرلری ساده‌جه ترجومه ائتدیک‌لری دئییل، حتی ساده، آنلاشیق‌لی بیر دیلله شرح ائتدیک‌لرینی ده گؤروروک.
بدیعی ادبیاتیمیزین آیریلماز ترکیب حیصه‌سی اولان ترجومه صنعتی‌نین آذربایجان تورکجه سینده قدیم تاریخی و زنگین عنعنه‌لری واردیر. آذربایجان تورکلرینین یوز ایللر بویو عرب‌لرله، فارس‌لارلا سیخ ادبی- مدنی علاقه‌ده اولماسی و مشترک ایسلام مدنیتی‌نین فورمالاشماسیندا ایشتیراکی ترجومه صنعتی‌نین تاریخی ضرورت کیمی اورتایا چیخماسینی شرطلن‌دیریردی" .کیتابی- دده قورقود"دا مقدس قورآنی-کریمین "اخلاص " سوره‌سی‌نین بدیعی و بیر او قدر ده سربست شکیلده ترجومه‌سی‌نین وئریلمه‌سی بو صنعتین آذربایجاندا، ائله‌جه ده بوتون اوغوز دونیاسیندا قدیم‌لیگینی ثبوت ان باشلیجا و توتارلی دلیل‌لردن بیری ساییلا بیلر.
یئنه ایل بایرامی یئنه من!
یئنه ایل بایرامی، یئنه من!
یازان: حسین واحدی
نئچه آی بوندان قاباق‌دان ایل‌بایرامینین گلمه‌سینی گؤزله‌ییردیم. فیكرلشیردیم نه آلاجایام، نه آلمایاجایام! بو ایش، چوخدا واختیمی آلیردی!! خیاوان‌دا یول گئدنده بونون باشماغینا باخ، اونون كؤینه‌یینه ، بونون قاییشی نجوردو، اونون پالتار سئتی نجوردو!! نه‌یی دئییم نه قالسین؟!
آللاها قوربان اولوم، منی‌ده فلك بئله ووروب، یئرده قالمیشام! جانیم به سنین ایشین-گوجون یوخدور- بیری تاپیلمیردی منه دئسین؟البته جماعت بئكاردا دئییل‌دی، هره اؤز مودونون دالیسیجایدی. چوخلاری‌دا گودوردو من هانسی بویادا باشماق آلسام اودا تئز اونون تایین آلسین. بونلاری فلك ائله یئره چالیب،مندن‌ده یازیق‌دیرلار!
هله ایندی بایرام اولوب كئچیب گئدیب، آز قالیر، تعطیلات‌دا باشا چاتسین!منه‌ده خاطیره‌لری قالیب. بایرامین ایلك گونوگئتدیك بؤیوك آغام گیله، عمیم گیلده اورادایدیلار، خانیمی منی گؤروب كئف-احوال ائدندن سونرا تئز كؤینه‌ییمیه باخیب، گولوب دئدی:گیجلر ساری سئور، تئز بو كؤینه‌یی دَییش!
بو سؤزو ائشیدندن سونرا آیری یئره او كؤینه‌یی گئیمه‌دیم.دوز ایكی‌آی بو كؤینه‌یی بازاردا آختارمیشدیم!
هله سیزه دئییم باشماق‌لاریمدان! دایی‌جانیم گیله بایرام گؤروشونه گئتمیشدیك، بیزی یولا سالاندا، دایی قاپی آغزیندا دئدی:اوغلان گئت بو باشماق‌لاری چیخارت، سن قیزسان؟ قیز‌باشماغی گئییب‌سن؟؟
بیرده من اولام بو باشماغی گئیم دئییب ائوه یئتیشیب اونلاریدا بیر قیراغا تولازلادیم!!
ایندی ایچیمده اؤزومه گولورم، نئجه اؤزومو اله سالدیرمیشدیم! ایكی-اوچ آی مودوم ایله اوینادیم، بایرام‌دا مندن شیكی اولماسین دئیه،هامی منی ال ایله گؤرستسین دئیه! آخیری نه اولدو!!
دئمه من چوخداندی درین یوخودایمیشام. بایرامدان اون‌گون كئچیردی. صوبح یوخودان اویانیب، ال-اوزومو یویاندا،آیناداكی اوز منه باخیب دئدی:
مد ایله اوینادین، ایچیندن خبرین اولمادی! یئنه بیر ایل كئچدی سن همن آدام قالدین، هئچ‌ده دَییشمه‌دین! اینسان‌اوغلو اؤزونه قاییت، اینسان اول... .
اؤزگورلوگون دادی Özgürlüyün dadı (حیکایه)
اؤزگورلوگون دادی
یازان: حسین واحدی
«توتون , توتون» دئیه, اووچولار آرخامجا قاچیردیلار. اوره‌گیم ثانیه‌لره ماجال وئرمه‌ییردی. کؤپک‌لر ایسه منی توتوب صاحیب‌لرینین یانین‌دا باش اوجا اولالار دئیه, دؤرد آیاق دا، بورج آلیب, یئیینجه قاچیردیلار. آیاق‌لاریمین گوجو تؤکنمیشدی. یازیق کؤپک لره اوره‌ییم یانیردی. هئچ زاد الده ائده بیلمه‌یه‌جک‌دیرلر، آنجاق, بیر سوچ‌سوزو توتوب, یییه‌لرینه وئرمه‌کدن سونرا هئچ نه‌یی دوشمونمه‌ییردیلر. او یازیق‌لار یالنیز یییه‌لرینه قوللوق ائتمک اوچون یارانیب لاری, سانماق اولوردو. اووچولار ایسه اونلاری قیزیشدیرماق اوچون, چئشیدلی سس‌لر چیخاریدیلار. سون نفسیمه‌دک, آیاقلاریما زور وئریب, آددیم‌لاریمی بؤیوک گؤتوروب بوروق وئره- وئره قاچیردیم. بیر آن, آیاغیم بیر آغاجا ایلیشیب باشی اوسته یئره دوشدوم.
نفرات برتر «نخستین جایزه ادبی اورمیه» معرفی شدند
منبع: arturmia.ir
تصاویر اختتامیه نخستین جشنواره ادبی اورمیه
1. مجتبی اسمعیل زاده
2. مریم علیپور
3. حسین واحدی - داستان کوتاه "دووارلار مه‌لر کن"
4. هادی خشایی
5. مهسا مهدیلو
چاغداش حیکایه چی لرین وصیت لری / حسین واحدی
چاغداش حیکایه‌چی‌لرین وصیت‌لری
حاضیرلایان: حسین واحدی
اشاره:
بو یازی‌دا، سؤز دئیه‌ن یازیچی‌لارین، چوخو وروغولاییب لار "یازیچی‌لیق دونیاسیندا، حتمی بیر قایدا، اون ماده‌لیک بیر لؤوح، اؤزل بیر دوزوک [نظامنامه]، یئرین جاذبه قانونونا تای دییشیلمه‌ین بیر قانون، یوخدور". دوغروسو، اونلاردان سوروشاندا "اصلینده، سیزین باشارینیزین سسببی نه ایدی؟"، وئره‌جکلری بیرینجی تپگی [عکس العمل] راحاتسیزلیق ایله دیسکینتی [اضطراب] ایدی. هم ان باشاریلی [موفقترین] همده ان باشاریسیز [ناموفقترین] یازیچی‌لار، نیگران اولوب، آرخایینسیزلیق [نامطمئن] حسی‌نی [دویغوسونو] تاپیبلار.
میثال اوچون، "کلایو بارکئر" یازیر: "باشاریلی [موفق] اولموشاما، اینانان گون، سانیرام [احتمال وئریرم] یازماقدان ال چکیب گئدم اینک یایام!".
باری لانگ یئر، اقرار ائدیر: "مینلرجه یانداشیم [طرفداریم] لا یازماغا یئنی باشلایانلار منی بوس-بوتون باشاریلی یازار سایاندا، اونلاردان آجیغیم گلیر. حس ائدیرم دونیانین ان گولمه‌لی آلدادیجی‌سییام [شیادییام].
البته بعضی یازیچی‌لار ایسه باشاریلی کلمه‌سینه دیلله‌نیرلر [اعتراض ائدیرلر]. اونلار، اؤز اینجه‌صنعت [هنر] سیرلارینی و اصول‌لارینی باشقالارینین گؤزوندن گیزلتمک مقصدی ایله یوخ، بلکه اونلارین چوخونون باخیشیندا، یازیچی‌لیغین بوتون و ساقینجا [جامع و مانع] شیفره‌لری [رمز لری] یوخدور.
اول ده چوخلو یازیچی‌لار دئییردیرلر، بو سؤالا جاواب وئرمک اولماز، آنجاق سونوندا هامیسی اونا جاواب وئردیلر. اونلارین هر بیری یاخشی بیر نکته‌لر و اؤیودلر [نصیحت لر] دیله گتیریبلر. آما هر کیمسه‌نین باشاری [موفقیت] شیفره‌سی اؤزونه اؤزل دیر [خاص دیر] و اولا بیلسین، بو اؤیودلرین بیری سیزین ایشینیزه یارارلی [فایدالی] اولسون.
میلتون لوماسک(Milton Lomask):
یادینیزدا اولسون، یازیچی‌لیغین بللی بیر چه‌می (شیوه‌سی) یوخدور. هر نه‌دیر سیزین چه‌مینیزدیر، تامام.
آلفرئد برئننئر(Alfred Brenner):
هر جوره اؤن‌یارقی‌نی [پیش داوری نی] قیراغا قویوب، هر نه‌دن باش چیخاردین، هر نه‌یی تجروبه ائدین و البته یازین. یازیچی‌لیغین هر نه‌یی یازماقدا اؤزتله‌نیز (خلاصه اولور).
روزماری دانی‌یئل:(Rosemary Daniell)
هئچواخت اؤزونو، باشقالاری ایله توتوشدورما [مقایسه ائتمه]، دئمیرم، ایسته‌یه‌سن اونلاردان بیرزاد اؤیرنه‌سن. چالیش، داییمن اؤزونله رقابت ده اولاسان، اوندا همیشه ایشله‌رین ان اوستون [اعلا/عالی] درجه‌ده قوجلو و قوتلى اولار. (من اوستون سؤزونو اوتاغیمدا اولان بیلدیریش تابلوسونا یازمیشام).
اورمیه لی حسن آیرانچی Həsən ayrançı
اورمودا پئشه له ری ایله آد چیخاردان اینسانلار
حسن آیرانچی
یازان: حسین واحدی
هر کند ده یوخسا شهرده بعضی لری، اؤز ایش- گوج‌لرینده آدلاری، یوردلاریندا دیللره دوشوب دولانیر. اورمو شهرینده ده چوخلو بئله دیرلی و ائل سئور اینسانلار واردیر. اونلاردان بیری ده حسن آیرانچی دیر.
قیرخ ایلدن چوخدور اورمیه‌نین ایمام (ره) خیاوانیندا اولان موخابرات کوچه‌سینده (یئرآلما دورمه‌یی کوچه‌سی)، حسن آیرانچی آدی دیللر ازبری اولوبدور. حسن آیرانچی 1316-دا اورمیه ده دونیایا گؤز آچیب، بو شهرده ایسه یاشاییب‌دیر. اونون اؤز دئدیگینه گؤره 1350 ایللرینده یئرآلما کابابی ایله آیران ساتماغا باشلاییر. حسن عمی‌نین آیرانلاری چوخ ایچملی و دئمک اولار تایسیز اولدوغو اوچون گئت-گئده اورمودا آد چیخاردیر. کئچمیش‌لردن بری اورمودا یئرآلما کابابی ایله آیران، اؤزونه گؤره بولان-سالان سئونلری و یئین‌لری واردیر. همده آیری شهرلردن گلنلرده هئچ اولماسا بیر دفعه یئرآلما دورمه‌یی یئییب اورمونون دادلی آیرانین ایچه‌جکدیر. آنجاق یئرآلما کابابی ایله آیران ساتماق ایشینه باخانلارین ایچینده حسن آیرانچی هر زامان اوستون و آدلیم اولوبدور. حسن آیرانچی، سونرالار توکانی بیر یئرآلما ساتان ایله شریک اولوب، یالنیز آیران ساتماق ایله مشغول اولور. بو ایکی‌لی، بیر مدت کئچندن سونرا ایندی‌یه‌دک کوسوله اولوب، آنجاق صولح ایله گون کئچیردیب بیرگه توکانی ایداره ائدیرلر.
ائلمان‌ین جوجه‌لری / اوشاق حیکایه‌سی
ائلمان‌ین جوجه‌لری
یازان: حسین واحدی
آنام، سحر تئزدن بیزه یئمك تاپماق اوچون یانیمیزدان آیریلمیشدی. منله بالاجا قارداشیم، دام اوستونده اوتورموشدوق. آنام، بالاجا «قارلی»-نی منه تاپشیرمیشدی. منده، بیر یئرده دوران دئییلدیم. باشیما گزمك وورموشدو.
دامدان، باشیمی آشاغی اَییب، حیطه باخدیم. بیز یاشایان ائوین خیردا اوشاغی تازا آلمیش ساری جوجه‌لری ایله اویناییردی.
جوجه‌لری گؤردوكده قارنیم یامان آجیقدی. «وای نه یئملی جوجه لردیرلر!» -اؤز اؤزومله دئدیم. بیر ایكی دانا سوموك‌له قارلی-نین باشین قاتدیم. یاواشجانا دامدان حه‌یط دووارنین اوستونه گئتدیم. بالاجا اوشاغین، گؤزلجه، جوجه‌لرله اوینادیغینا، تاماهیم گئتدی. آنجاق آجلیق بونلاری تانیمازدی.
بیر آز پوساندان سونرا حیطین ایچینه آتیلیب، گولدانلارین دیبینه سیندیم. جوجه‌لر بویان- اویانا قاچیردیرلار.
بیر آزدان ائوین ایچیندان اوجا سسده هارای سسی گلدی. آز قالدی اوره‌ییم یئریندن چیخسین. اوشاغین آناسی، «ائلمان، داها جانا گتیردین بیزی، آخشام آتان گلنده، دئییه‌جه‌یم جوجه لری آپاریب ساتسین»- دئییردی.
یازیق اوشاق، بیر قیراقدا توموب، اوتوردو. گؤزل گؤزلریندن نارین-نارین گؤز‌یاشی آخیردی. اللرین گؤیه توتوب،«آللاهیم، نه اولای، منیم یولداشلاییمی ساتماسیننای، من ته قالایام»- دئدی.
اوره ییمی یاخدی بو سؤزلر. جوجه‌لری توتماقدان واز كئچدیم. دووار اوستونه آتیلیب داما دؤندوم. قارلی هله‌ده سوموكلرله اویناییردی. بیر آزدان آنام نئچه دنه یئملی سیچان گتیریب، دئییب، گوله-گوله یئدیك. آنجاق من ائلمانی دوشونوردوم. گونش گئدیب یاتمیشدی. آی ایشیغین بیزلر-له، پایلاشیردی.
اییلیب حیطه باخدیم. جوك-جوك سسی یووا ایچیندن گلیردی. ائلمان-ین آتاسینین سسین ائشیتدیم،«خانیم، من سؤز وئریرم ائلمان سنین سؤزونه باخاجاق. منده جوجه‌لرین ساتمایاجاغام...»- دئییردی.
ائلمان سئوینجك حیطه گلیب اللرین گؤیه توتوب،«آللاه چوخ شوكوی.»- دئدی. منده سئوینه- سئوینه گئدیب یوخویا جومدوم.
